قصة طفل أنقذه الله بالدكتور المهدي الشفعي من مجزرة من يتاجر بأجساد الناس

25 يوليو 2018 01:06
قصة طفل أنقذه الله بالدكتور المهدي الشفعي من مجزرة من يتاجر بأجساد الناس

هوية بريس – عبد الله المصمودي

في خضم الحملة المتضامنة مع الدكتور الطبيب الجراح أخصائي الأطفال المهدي الشفعي، نشر أحد الآباء على حسابه في فيسبوك قصة ابنه الذي كان يعاني من ألم في حنجرته، وكان قريبا من أن يكون ضحية متاجرة دنيئة من أحد الأطباء، قبل أن ينقذ الله الوالد والولد، ويتم عرض الطفل على طبيب الفئة المسحوقة.

الوالد سميح كتب في حسابه على مسؤوليته: “على مسؤوليتي
شاء الله عز وجل أن ولدي الصغير عندو آلام فالحنجرة مشيت عند طبيب أخصائي قال ليا بالحرف ولدك خاصوا عملية مستعجلة وإلا غادي إتصاب بروماتيزم القلب بدا سي الطبيب كيتاوا معايا على الثمن عطاني جوج أثمنة واحد ديال المصحة او التاني ديال العيادة حيت ممكن إدير العملية غير فالعيادة على ما كال وعلى عجل على أي طلبت مهلة باش نوجد المبلغ أولا وثانيا مبقاتش عندي ثقة فالأطباء بحكم التجارب ديالي رجعت لدار وأنا في حيرة من أمري طلبت من الله إدير شي تاويل ديال الخير.

واحد النهار حليت الفايس بوك لقيت واحد الصديقة برطجات واحد المنشور كان الموضوع ديالو إحالة ملف طبيب جراح للأطفال بتزنيت على المجلس التأديبي بتهم وهمية لم أتردد بزيارته في المستشفى الإقليمي الحسن الأول وبدون تردد او خوف لأن وبكل بساطة لي لقيتيه محارب من طرف المسؤولين فهاد البلاد كن على يقين بلي خالق ليهوم مشاكيل بالجدية والإتقان فالعمل ديالو المهم هاتفت الطبيب بعد السلام عرفتو براسي او شرحت ليه المشكل ديال ولدي وبكل تواضع وترحاب وكل أريحية قال لي مرحبا سيدي جيب لي ولدك لمستشفى.

فعلا لم أتردد شديت الوجهة نحو مدينة تزنيت تما لقيت العذاب النفسي باش نشوف الطبيب الشفعي من طرف حراس الأمن الخاص كيسمعوا إسم الشفعي كيجيهوم بحال الما القاطع مرة كيكولو ليك مكاينش ومرات كيقولو ليك كاين فالعمليات وبعد تأكدي أن هناك شي حاجة ماشي هيا هديك ألحيت باش ندخل نشوف الطبيب قال لي الحارس بلي خاص واحد لي إدخل مع الدري عند الطبيب يا إما الأب يا إما الأم هادي عمري سمعتها تاني فداك الوقت كنت هاز واحد الكاس ديال قهوة كحلة زحلة خرجتها من ديك الآلة لي كاينة فساحة الإستقبال داخل المستشفى ولكن مع التدافع لي اوقع لي مع حارس الأمن تخوات على ولدي ولولا الألطاف كنا غادي نكملوها فالكوميسرية ملي شافها خونا حماضت أذن لنا بالدخول وبالترحيب نعماس او موقع باس او دار الله خير معرفنا أش كان غادي يوقع.

المهم خليت خونا كيهضر او إبرر الفعلة ديالو او دخلت كنقلب على مكتب الطبيب صراحة لقيت المرضى كيدخلو لمكتب الطبيب ومدة الزيارة كتراوح بين 2 إلى 5 دقائق وكان كل مرة كيخرجو الآباء من عند الطبيب كنشوف الفرحة او الإبتسامة على محياهم او الحيوية والنشاط عند الأطفال والكل يعلم العلاقة المتأزمة التي تجمع الأطفال بالأطباء لعدة أسباب لا داعي لذكرها ولكن مع سي المهدي بحكم 3 أيام دوزتها فداك السبيتار عمرني سمعتهم بكاو المهم جا دورنا ندخلو عند الطبيب بعد التحية والسلام شرحت ليه سبب الزيارة قال ليا مرحباجبد الهاتف النقال ديالو شعل فيه البيل ثم توجه نحو إبني يحيا لي كان جالس فوق السرير او بديت كنوجد راسي باش نشد ولدي باش إقلب ليه الحنجرة حيت فاش كنت عند الطبيب الأخصائي دوزنا حرب أهلية مع سي يحيا باش إشوف الطبيب الحنجرة ديالو ولكن سي الشفعي طلب مني باش نكلس او نشوف وبكل مهنية وباحترافية وبكل بساطة مع بعض التقديمات و بلغة طيور الجنة حل يحيا فمو وهو مبتسم تما عرفت علاش كاع دوك الأطفال لي زارو الطبيب مبكاوش تما عرفت بلي ماشي غار جي او كون طبيب أطفال او تما عرفت علاش الطبيب محاربينو بكل الطرق.

المهم الطبيب طلب مني باش ندير بعض التحاليل او غادي إكون خير المهم ودعت الطبيب على أمل العودة في اليوم الموالي فعلا مشيت باش يحيا إدير التحاليل داخل المستشفى او هاد التحاليل من المفروض غادي إخرجو فنهار ولكن صدقنا ف يومين حيت نعماس هدوك الناس لي كيحيدو الدم مكيعرفوش إحيدو الدم لدراري الصغار او صدقو التحاليل خاسرين حيت الدم خداوه بطريقة غير سليمة وبالتالي النتائج مخرجوش كاملين يعني خاصنا نتسناو تال نهار لاخر باش نعاودو نحيدو الدم المهم دوك الضحيكات ديال سي يحيا مع سي الشفعي هجروهوم ليه فالتحليل المهم خرجو التحاليل بعد كل المعانات.

فاليوم الموالي عيط على سي الشفعي باش نعتادر ليه حيت خلفت الموعد بسبب التحاليل او درنا موعد آخر ولكن فاش مشيت لقيت تما حارس أمن قال لي بالحرف بلي الطبيب مكاينش جاتني غريبة كيفاش الطبيب قال لي كاين او حارس الآمن ينفي خرجت التليفون من جيبي باش نهضر مع الطبيب وإدا بالحارس كيستفسرني مع من غانهضر جاوبتو غانهضر مع الطبيب وبسرعة طلب مني باش ندخل حيت راه ممكن الطبيب دخل فديك اللحظة لي كنت فيها أنا تما المهم ضحكت واحد الضحكة استهزائية او مشيت لمكتب الطبيب ستقبلني بحفاوته المعهودة سولتو علاش حراس الأمن كيتعملو مع المرضى بديك الطريقة أكد لي بلي على ود دوك التصرفات كيعطي رقم الهاتف ديالو للأباء المهم شرح لي كل شئ ونفى أن يكون إبني بحاجة لعملية جراحية مستعجلة بعد الإطلاع على نتائج التحاليل كل ما هنالك عملية بسيطة على مستوى اللسان وبالفعل قرر الطبيب إجراء العملية في اليوم الموالي وبفضل الله وفضل الدكتور المهدي الشفعي دازت العملية في أحسن الظروف ودامت مدتها الزمنية أقل من 5 دقائق ليخرج إبني من غرفة العمليات وكأن شئ لم يقع ومنذ ذالك الوقت وإبني على أحسن حال لم يعد يعاني من أي ألم.

واش عرفتو دابا علاش هاد الحرب كاملة ضد الشفعي حيت ساد البيبان على السماسرية لي هوما حراس الأمن لي خدامين عند سيدهوم المدير كيتسمسرو فالصحة ديال الناس حيت ساد البيبان على المصحات الخاصة حيت الدكتور الشفعي معندوش المستحيل والمستعصي حيت الدكتور الشفعي عندو الجهاد وبإمكانيات جد محدودة وإن لم أقل منعدمة حيت التليفون ديال الشافعي كيصوني او كايجاوب لي كان من المرضى لي كيشرف على الحالات ديالهوم حيت الشفعي مكيعرفش الأعياد او المناسبات او الليل او النهار حيت الشافعي نهار دخل لمهنة الطب او ختار إختصاص جراحة الأطفال عرف بلي الوطن فيه خصاص فهاد التخصص.

حيت الدكتور الشفعي عندو مبادئ وأخلاقيات المهنة حيت الدكتور الشفعي عارف بلي الأطفال إلى ملقاو العناية الطبية اللازمة غادي إولي عندنا أجيال وأجيال من المعاقين جسديا والحالات كثيرة بأخطاء طبية بالمستشفيات العمومية كون بغا الشفعي إدير لباس أو إعيش فالفيلات او إشد VIP باش إشطح فالمهرجانات على أنغام دنيا باطمة او إتعشا معاها كاع فحفلات خاصة كون مشا إكزركوم فالمصحات الخاصة ولكن الدكتور الشفعي ولد الشعب او بمعنى آخر الدكتور الشفعي ولد الخبز او أتاي نتوما شطحتوا او غنيتو تال الصباح على أنغام دنيا باطمة بمهرجان تزنيت او الدكتور الشافعي صابح فالمحكمة كيتحاكم فنفس المدينة الذنب ديالو حيت بغا إحارب الفساد او حيت كان بايت سهران على صحة أطفال هذا الوطن الذي لم يعد يعترف سوى بالمفسدين والفاسدين ملي كنتو نتوما كتنقزو او تلوحو باقات الورود على لالاكم دنيا أليس الشفعي الأجدر والأحق بتلك الورود ولكن:

لا تأسفن على غدر الزمان لطالما…رقصت على جثث الأسود كلابا
لا تحسبن برقصها تعلو على أسيادها…تبقى الأسود أسودا والكلاب كلابا
تبقى الأسود مخيفة في أسرها…حتى وإن نبحت عليها كلاب
تموت الأسد في الغابات جوعا… ولحم الضأن تأكله الكــلاب

آخر اﻷخبار
1 comments

التعليق

اﻷكثر مشاهدة

حالة الطقس
13°
20°
السبت
20°
أحد
19°
الإثنين
18°
الثلاثاء

حديث الصورة

صورة.. وفاة رجل بعد أدائه صلاة المغرب في مسجد الوردة 2 بطنجة

كاريكاتير

كاريكاتير.. بعد أن جردوها من احتشامها وحيائها