بعد رفض استقالته من وزارة الصحة طبيب ينشر تدوينة نارية ويهدد بالانتحار “وثيقة وتدوينة”

هوية بريس-أحمد السالمي

رفضت وزارة الصحة استقالة طبيب مختص في التخدير والإنعاش بإقليم تطوان، وعللت رفضها بكون ”قضاء المدة “القانونية المتمثلة في 8 سنوات”  لا يترتب عنه تلقائياً الحق في قبول الإستقالة، وذلك بأنكم موظف عمومي تسري عليكم أحكام النظام الأساسي للوظيفة العمومية، الذي يقضي في صله 77 بأنه لا عمل بالإستقالة إلا إذا قبلتها السلطة التي لها حق التسمية”.

كما استدلت بوقائع مشابهة من محكمة النقض وكان الحكم فيها، هو التأكيد أن طلب الاستقالة يندرج ضمن السلطة التقديرية للإدارة التي تمكنها حسب ما تقتضيه المصلحة العامة وحاجيات المرفق العمومي، إما بالاستجابة لها أو رفضها.

وبعد تلقيه برسالة الرفض عبر الطبيب المذكور في تدوينة غاضبة عن هذا الرفض من الوزارة الوصية حيث قال: “واش هذا ماشي انحراف في استعمال السلطة ماللي تشدني بزز مني وأنا ساني معاك 8 سنين وأنا مكملها وفايتها للهيه وتشدني فسبيطارات الذل والقهرة…بلا تجهيزات بلا معدات طبية بلا أدوية…. واش هذا ماشي خطأ بين فالتقدير ماللي ماتجاوبنيش على طلب الإستقالة ديالي حتى نخرج للرأي العام… وفين هو الجواب ديالكم على طلب الإستقالة ديالي الأولى…؟… 21 يوم باش يوصل طلب الإستقالة ديالي للرباط بحال ايلا هابط على رجليه و16 يوم باش نتوصل بيه وهو مكتوب جاي ففاكس نهار 4 فبراير وليوما 20 بحال ايلا جاي كيحبو على رجليه….

وواصلني فواتساب… واش هذا ماشي انحراف في استعمال السلطة وماشي خطأ بين فالتقدير ماللي تفرض علي نبقى خدام فمعتقل وفسجن وزارة الصحة بجوج دالريال… ايلا بالصح عندكم الغيرة على الصالح العام وجدو للمواطن المغربي ظروف العلاج بكرامة…ماشي المواطن المغربي يجي مسكين مهرس فكسيدة وتصيفطوه يشري الحديد باش يدير للعملية…..

ماشي المريض يجي للمستعجلات وتصيفطوه يشري الدوا من الفرماسيان… ماشي تحطو طبيب عام واحد وممرض فالمستعجلات… هاد الطبيب اللي كيشوف حتى ل300 مريض بستيلو وصناتة شاريها من جيبو.. وأغلبية المستعجلات مافيهم لا باش تعبر الطونسيو لا باش تعبر السكر لا نممي…

ماشي تخدمو طبيب دالإنعاش فبيت حشومة نگولو عليه حتى مصلحة إنعاش…. ايلا بالصح قلبكم على المواطن المغربي وجدو ليه ظروف العلاج بأعلى جودة ممكنة ماشي العلم فجيه وظروف الإشتغال فجهة أخرى…ايلا بالصح قلبكم على صحة المواطن المغربي متخلليوهش يسعى الدوا والعلاج فمواقع التواصل الإجتماعية….

ايلا بالصح نتوما معقولين گولو للناس هذا هو جهدنا عليكوم فالصحة واللي بغى يموت يموت ….ايلا قلبكم على المواطن المغربي وجدو ليه مسكين غير شكون يبدل ليه الكوشة وهو كوما عوض ماتجيبو سكرتيرات جيبو مساعدات العلاج اللي يقابلو المرضى…

ايلا قلبكم على المواطن المغربي آجيو كلكم گلسو تتدواو معاه فنفس الظروف اللي كيتعالج فيها هو… أنا ماعمري شفت شي فرنساوي كيجي يتعالج فالمغرب ولكن العكس صحيح إيوا فهم الفاهم… أنا ايلا وقعات لي شي حاجة ولا مشيت للحبس ولا انتاحرت ذنوبي وذنوب دوك الوليدات عليكوم نتوما.