منشور متداول.. طريقة استرجاع الهاتف المسروق قانونيا!!

هوية بريس – عبد الله المصمودي

انتشر بشكل كبير في موقع فيسبوك، منشور يتحدث على الخطوات التي يجب على صاحب كل هاتف مسروق القيام بها، حتى يسترجع هاتفه، وحتى يسهم بذلك في التقليل من جرائم سرقة الهواتف.

حيث جاء في المنشور، وهو مكتب بالدارجة المغربية: “أي واحد فينا تشفر ليه تيليفون اولى كيعرف شي واحد تسرق ليه، ولكن قليل فينا لي كيعرف شي واحد ديكلارا اي دار شكاية عند الشرطة. هاد الشي هو الديفوا لي كنديروا.
كل واحد فينا كيسمع بالشرطة العلمية ولكن عمرنا مكملنا الجملة وقلنا الشرطة العلمية والتقنية.
اجي نفصلوا هاد التقنية مزيان؟
التقنية أي مواكبة التقنيات الحديثة من اجهزة وحواسيب او غيرها، الشرطة التقنية عندهم مصلحة مكلفة فقط بتتبع الهواتف وفك تشفيرها ومراقبة المكالمات.
الشفار ملي كيسرق كيفورماطي التيليفون وكيخدم نمرة من نوامر ديال هاد البلاد، ملي كتخدم اي نمرة فالتيليفون راه اتوماتيكياً كتعرف عند الشرطة التقنية او ANRT.
غادين تقولوا كيفاش عرفوا النمرة جرب تركب فالتليفون ديالك (#06#*)، غادي يطلع ليك واحد الرقم سميتوا الايمي، هاد الرقم لي طلع ليك عندك نتا بوحدك فالعالم كامل او ميمكنش يتبدل.. لحد الساعة تفاهمنا، مزيان.
اذن كنطلب من اي واحد يحط هاد الرقم فالأجوندا ديالوا، ولي معندوش كونطرا ديال لاكارط سيم يمشي يديرها.
الأن تشفر ليك تيليفون ونتا عندك هاد جوج سوارت شنو غادي دير؟
اولا غادي تسول فين كاين لابيجي ديال البوليس واي مدينة فيها البوليس عندها مركز ديال لابيجي، غادي توجه عندهم وغادي تدير شكاية انك تشفرتي بالسلاح الابيض او اي عنف واجهك وغادي تقوليهم عندي الرقم التسلسلي ديال الهاتف غادين ياخدوه وغادين اي سايفطوه لشرطة العلمية والتقنية او من بعد ايام غادين يعيطوا ليك وغادين يجبدو ليك اخر الارقام والمحادثات وغادي يتسناو منك تقوليهم هذا تليفوني.
من بعد غادين يجيبوا الشفار ولا لي شراه من عندوا في حالة التماطل كاين وكيل الملك كاتدير عندو شكاية وكاتابع الملف ديالك بطريقة قانونية.
تصورو كون كولشي كايدير هادشي، شحال ديال الشفارة غادي يديرو بناقص من سرقة الهواتف على الأقل وغادي تكون ساهمتي في الحفاظ على الأمن”.

يشار إلى أنه من أكثر الجرائم التي يتعرض لها الناس، خصوصا الفتيات، هي سرقة الهواتف، سواء تحت التهديد والعنف أو عن طريق الخطف باستعمال الدراجات النارية.