بالفيديو.. هذا آخر ما كتب ونشر الداعية المصري أمير منير عن “عمرة البدل” قبل اعتقاله
هوية بريس – أمير منير
عن عمرة البدل .. التعليق الأخير
⚫ تعرف إن لو الموضوع فلوس كنت عملت ملايين النهارده بس من قبول اللقاءات التليفزيونية والمواقع والجرائد -اللي مش برد عليهم أصلا- ونقلت في فيلا النهارده وبشكرك على الترند وأنا هناك.
⚫ تعرف إن لو الموضوع فلوس كنت فتحت إعلانات اليوتيوب والفيسبوك اللي أنا قافلها جابتلي آلاف الدولارات من المشاهدات بس من غير ما أوجع دماغي بس كان ومازال رأيي إنها حرام مع كامل احترامي وتقديري لعلمائنا اللي شايفين مفيهاش مشكلة.
⚫ كلمني بس هنا فيه حاجة اسمها حد يعمل عن حد عمرة أو حج؟
الوكالة أو الإنابة بالحج جائزة يا طيبين عن المتوفى والعاجز والمريض الذي لا يرجى برؤه وده رأي الجمهور من أهل العلم وهو رأي جمهور الفقهاء من الحنفية والشافعية والحنابلة عكس رأي الإمام مالك اللي رأيه إنه مينفعش إلا لو وصى المتوفى قبل موته ومينفعش أصلا للعاجز لإنه فقد القدرة.
واختيار فتاوى اللجنة الدائمة “إذا اعتمرت عن نفسك جاز لك أن تعتمر عن أمك وأبيك إذا كانا عاجزين لكبر أو مرض لا يرجى برؤه.
وفوق كل ده حديث النبي صلى الله عليه وسلم لما جاءه من يسأله
“يا رسولَ اللَّهِ، إنَّ أبي شيخٌ كبيرٌ لا يستطيعُ الحجَّ ولا العُمرةَ ولا الظَّعنَ قال: فحُجَّ عن أبيكَ واعتمِرْ“.
⚫ أيوه يا حبيبي بس الكلام ده مينفعش بفلوس .. إزاي حد ياخد فلوس على عبادة مش ديه تجارة بالدين؟
يجوز الاستئجار على الحج – يعني أدفع فلوس مقابل إن حد يحج عن حد – وهو مذهب المالكية والشافعية ورواية عن أحمد ابن حنبل.
على عكس رأي الإمام أبي حنيفة .. وما ذهب إليه ابن تيمية إنه لا يصل ثوابه للميت ولا للعاجز.
(وواضح إن ده رأي الشيخ عثمان الخميس حفظه الله وبارك فيه في إن الأمر بدعة) والأمر على الخلاف زي ما وضحت.
ودليل الفقهاء على الجواز
قول النبي صلى الله عليه وسلم “إن حق ما اتخذتم عليه أجرا كتاب الله”
وقصة الصحابي اللي رقى الملدوغ وأخذ أجره قطيع من الغنم وأقره النبي صلى الله عليه وسلم على ذلك.
فمن هنا قال الفقهاء إنه طالما يجوز للراقي أخذ المال فيبقى أولى إنه يجوز لمن قام بالعبادات التي تدخلها النيابة كالحج والعمرة.
(في التعليقات رابط فتاوى علماء دار الإفتاء في مصر على كل ده عشان نسمع الفتوى من علماء الأزهر).
⚫ طب ما اللي هيعملها ده ميعرفش الميت أو العاجز ولازم يبقى حد من أهله يبقى كده مينفعش؟
زي ما شوفنا في النقطة اللي فاتت جواز الإجارة عند الكثير من أهل العلم وبالتالي اللي هستأجره يعمل العمرة بالإنابة مش لازم يكون يعرف المتوفى أو العاجز المهم يكون من أهل الخير والدراية بالعمرة وإنه يكون حج أو اعتمر عن نفسه قبل ما يعملها لغيره.
⚫ طب ما اللي هيعملها كده هيعملها للفلوس مش لله يبقى مش هتوصل للي وكله بيها؟
ليه الدخول في نوايا البشر وكأن الكل شياطين؟! ولكن هفترض معاك ده طالما أحرم بالعمرة عن الشخص اللي وكله بيها وقام بها على وجهها يصل ثواب الفعل إلى من وكله.
ثواب من قام بالفعل نفسه (اللي أنت وكلته) هو اللي هيتأثر بنيته فلو كانت نيته لله حاز الأجر أما لو كانت نيته غير ذلك فليس له شيء.
يعني اللي وكل حد بالعمرة (عن ميت أو مريض او متوفى) الثواب يصله بغض النظر عن صدق نية اللي وكله بيها (مؤدي العمرة) ولكن زي ما قولنا نجتهد في اختيار الصالحين اللي عندهم علم.
⚫ أيوة أنت بتدافع عن الأبلكيشن بتاعك عشان بتكسب منه؟
من العجب إن الناس اتهمت بغير دليل.
والله الأبلكيشن لا بتاعي ولا باخد منه نسبة ولا لي علاقة أكثر من أني لقيته يسهل على المسلمين شيء من أمر دينهم فحبيت أوصله ليكم!
⚫ يبقى الأبلكيشن بتاع نصابين وأنت متعرفهمش وعملت الإعلان عشان الفلوس ولا بتجمع أموال للإخوان والسلفيين؟
يا جماعة فيه ناس حوار إخوان وسلفيين ده كل دماغهم خلاص معندهمش غيره.
أنا عمري لا انتميت ولا هنتمي لأي جهة أو جماعة .. أنا مسلم وبس ينفع؟!
والأبلكيشن تابع لشركة مسجلة بالمملكة العربية السعودية وتحت رقابة الحكومة ووزارة التجارة السعودية وده أبلكيشن تجاري وسيط بين المُوكِل ومن يوكله بالخدمة بيقدم خدمة لا هو تحويل أموال ولا جمع تبرعات وبيضمن اختيار المؤدي بدقة وإن الأمر يتم ويوصل للمُوكِل الإثبات والأدلة.
فحوار إنه يطلع يصور فيديوهات أي كلام لكل الناس من غير ما يعمل العمرة بجد ده أمر مستبعد لإنهم مش أفراد مجهولين ديه شركة وعليهم رقابة.
وأنا هناك رحت شوفت مقرهم واتفرجت على كل شيء بنفسي ومتكلمتش ولا كلمة إلا وأنا متأكد قدر إمكاني وبيني وبينهم الله
⚫ يعني بتدعم السعوية وعايزنا ندفع لها فلوس؟
الموضوع شركة بتقدم خدمة لا جمع تبرعات ولا غيره وبعدين يا جماعة الكعبة هناك والله مش بإيدي فبالتالي الخدمة المقدمة هناك برضه ولو عليا فأنا أدعم بلدي بكل ما أملك وربي شاهد على المجهود اللي بيتعمل في إحياء القرى الفقيرة وإعمار البيوت ومحطات الميه والمدارس والكتاتيب وغيرها لخدمة بلدي مع واحدة من المؤسسات الموثوقة اللي شغالة تحت نظر الدولة ورقابتها وده دوري مش منة مني ولا حول ولا قوة إلا بالله.
⚫ واضمن منين إن اللي هيعملي العمرة ده مش هيهبل ويلخبط ويعمل اي كلام؟
من الحاجات اللي تأكدت منهم عليها إن كل القائمين على أداء العمرة في الأبلكيشن من الدعاة وطلبة العلم واللي في أغلب الحال محتاجين دخل لتفرغهم للدعوة أو طلب العلم فبالتالي بيقوموا بالعمرات على أكمل وجه وده مصدر دخل يعيلهم ويساعدهم وبيننا وبينهم الله.
⚫ طب مفيش بقى عمرة بالميتافيرس ولا على زووم؟
لا يجوز والله ولو حد قادر يبقى عليه يقوم بالعبادة على وجهها بنفسه لإنه لا متوفى ولا عاجز ولامريض لا يرجى برؤه.
⚫ طب ومفيش ابلكيشن علينا يصلي ويصوم عني؟
فيه عبادات الفقهاء أجازوا فيها الإنابة زي الأضحية زي الزكاة زي العمرة والحج وغيرها مما أجازه الفقهاء.
وفيه عبادات لا يجوز فيها الإنابة زي الصلاة والصوم (عارف إن السؤال سف لكن قولت نستفيد).
⚫ طب إيه رأيك إني دخلت على الأبلكيشن ولقيت الحوار أغلى من اللي أنت قولته ده مش نصب برضه؟
ما أنا قولت في الكومنت اللي اتريقتوا عليه الله يسامحكم غيروا السعر للمصري في الإعدادات عشان تشوفوا أسعار مصر.
ليه بقى؟ لأني لما جربت الخدمة وحسيت فيها خير للناس لقيت أسعارها بالريال كبيرة علينا فكلمت الناس إنهم لو هينزلوا الخدمة لمصر لازم ينزلوها أرخص واستجابوا بالفعل وعملوا الخدمة لمصر بسعر أرخص وقالوا لي -وأنا افتكرت إنها حاجة هتفرح الناس برضه- هنعمل لك خصم بكود مخصوص يخليها ارخص كمان.
فوصل الموضوع إنه بقى بـ3600 تقريبا يعني 360 ريال واللي في السعودية عارف إن المبلغ ده بعد مصاريف العمرة والتوزيع بين الأبلكيشن لإنه المنظم للأمر وبين مقدم الخدمة مش مبلغ كبير هناك.
⚫ بس العمرة المستعجلة أغلى وعمرة رمضان أغلى؟
الفكرة في إن العمرة المستعجلة تتم في نفس اليوم فبالتالي حطوا لها سعر مختلف وإن عمرة رمضان في الأصل أغلى من الطبيعي ومع كل ده اعتراضك في النقطة ديه وجيه جدا وممكن يكون في محله وصح وممكن نناقشهم في ده كشركة ونشوف ممكن نوصل لإيه!
⚫ طب أنا في مكة وبعملها وهعملها للناس ببلاش؟
هو ده الصح وفعلت الأولى وجزاك الله خيرا والناس اللي في مكة يا ريت يعمموا الأمر ده ويسهلوا الأمر على الناس ومن تطوع فأكيد فعله أحسن والله أعلم أجره أكبر.
⚫ هي كل حاجة خليتوها تجارة حتى الحج والعمرة والعبادات من غير لا خشوع ولا طاعة؟
يا أخي وحبيبي احنا لا نعدم الخير في أمتنا أبدا هيفضل فيه اللي هيعلم القرآن مجانا واللي بيعمل عمرات وحج مجانا لإنه ربنا رزقه من طريق آخر.
وهيفضل برضه ناس متفرغة للطاعة محتاجة دخل من تعليمها والقيام بالإنابة عنك في بعض الأمور الشرعية بتقوى وخشوع عند أغلبهم نحسبهم كذلك ولا نزكيهم على الله وده بيعينهم على استكمال طريقهم سواء من تعلم الدين أو الدعوة إلى الله وفي كل خير.
ولو رجعت تاني لرأي الفقهاء هتلاقيهم اتكلموا عن استئجار من ينوب بالعمرة والحج يعني الموضوع من مئات السنين ولا بقى تجارة ولا غيره ولكنها مصالح تتلاقى صاحب خدمة يبحث عنها ومؤدي للخدمة محتاج ثمنها وزي ما قولنا الجمهور من أهل العلم أجاز ذلك يعني دين ومش حرام على حد فيهم.
⚫ أول مرة اسمع عن الحوار ده؟!
الأمر مشهور منذ زمن الأئمة ودلوقتي فيه عشرات التطبيقات في السعودية وغيرها من الدول لعمرة البدل على فكرة فالأمر مش جديد
⚫ واخد كام في الحوار ده يا نصاب يا تاجر الدين؟
يا رب أصلح نيتي .. بص يا سيدي زي ما شرحت لك لو الموضوع فلوس والله ما كنت هحتاج لا اعمل إعلان ولا غيره .. ديتها سيب الإعلانات المفتوحة وأهلا بآلاف الدولارات وأنا سايب إيدي.
المهم .. فعلا الإعلانات مصدر من مصادر دخل كل مقدم محتوى على السوشيال ميديا .. وربي يعلم إني لا أقبل إعلان إلا بعد ما أقرف أصحابه بحث وطلب إثباتات بل وقسم وشهادة لله أنهم صادقين واستخارة وقد يدوم ده لأسابيع وشهور وبعدها ممكن برضه أرفض.. وأتحدى أي حد أن يدعي إني عملت له فيديو أو إعلان قبل ما اتأكد منه 100%.. وده طبعا بيخلي الموضوع تقريبا لا شيء نظرا لكثرة الرفض أو طول عملية القبول.
ووالله لو قبلت كل إعلان كان زماني برضه برد عليك من مكتبي في الفيلا مش من على مكتب الواد ابني في أوضته اللي أنا طارده منها عشان أركز
⚫ بس أنت قديم في النصب يا أمير فاكر موضوع المحاضرة أم 3000 جنيه اللي حضرها آلاف الناس وموضوع تعليم الأطفال الـ AI في الأكاديمية بتاعتك؟
اسمح لي أنت قديم أوي.
المحاضرة أم 3000 كانت ورشة عمل وحضرها 20 واحد (عدهم في الصورة اللي في التعليقات) تقريبا بعد شهرين شغل عليها وأظن خدت شهر في التنفيذ يعني الفلوس متقسمة على ال٣ شهور مجهود وده غير مصاريفها ثم اتقسمت على ٢ يعني فلوس كتير أوي زي ما أنت شايف وزي ما قالوا ظلما وزورا إن الأبلكيشن بتاع عمرة البدل بتاعي زي ما برضه قالوا ساعتها حضرها آلاف وأهو اللي بيحب يصدق بيصدق.
أما موضوع ال Ai للأطفال فهرد عليك باللي انجزناه مع ولادنا في الأكاديمية اللي أنا صاحبها بس شغال معايا مدربين وفوقيهم أساتذة جامعة هما اللي متخصصين مش أنا وهتلاقوا الصور في التعليقات.
دخلنا مسابقة codeavour في مصر بـ24 فريق تأهل منهم 9 فرق للمسابقة العالمية.
ولادنا مالك أسامة فاز best ai&ml award في مصر
شمس ومروة girl in stem award
في مسابقة codeavour الإمارات اللي فيها مشاركين من كل الجنسيات ابننا يامن فاز بالمركز التاني.
ولسه كتير بإذن الله ديه بس البداية وصور الولاد والجوايز في التعليقات
⚫ طب وحوار آبار أفريقيا؟!
آبار إيه وأفريقيا إيه أنا عمري ما اتكلمت على موضوع آبار لا في أفريقيا ولا في مصر (هنا عملنا محطات تحلية جميلة بتخدم الناس والحمد لله تحت إشراف الدولة) ولو كلمتك في يوم جي عن حاجة زي ديه اعرف إني متأكد منها فوق الـ100% فيما استطعت وإلا مش هتكلم.
ولو اتهمنا كل صاحب خير في دينه مش هنعمل خير أبدا وناس في مصر وبرة مصر هتموت من العطش لإنهم محتاجين فعلا.. وناس في مصر وبرة مصر هتموت من البرد لإنهم محتاجين فعلا .. وناس من مصر وبرة مصر هتعيش في ظلام وجهل لإنهم محتاجين فعلا.
يبقى الصح إني لا أتهم كل خلق الله في دينهم ولكن اتحرى واجتهد في الوصول للصادق.
⚫ بس أنا معجبنيش طرحك للموضوع؟
حقك وجايز فعلا يكون جانبني الصواب ومكنتش موفق وده أمر أنتم اللي تحكموا عليه مش أنا فلو كان كذلك فأنا يعتذر عن أسلوبي لو ضايقك.
وأكيد بغلط وهغلط ولازم لما أغلط اعتذر.
⚫ أنت برضه نصاب وتاجر دين؟
بعد كل ده .. براحتك
⚫ كام نقطة أخيرة بقى:
1- أنا حذفت الفيديو بالفعل استجابة للشركة السعودية صاحبة التطبيق اللي تواصلت معايا وطلبت مني ده خوفا منهم عليّ جزاهم الله خيرا مش عشان لا فلان هاجم ولا علان قال كل ده والله ولا فارق معايا لا طلبت رضاهم أولا ولا هطلبه في يوم من الأيام.. إنما أطلب رضا ربي.. وبرضه شيلته كرامة لمن يحبني وساءه الفيديو اختلافا ما بيننا في وجهة النظر أو فهمه غلط وإثباتا للنوايا الحسنة.
2- ممكن نحسن الظن ببعض ونبطل ندخل في نوايا لا يعلمها إلا الله.
3- لو هترفض شيء خصوصا لو ديني أبحث وراه الأول يمكن وجهة نظرك تطلع غلط – والإنسان عدو ما يجهل – وساعتها ممكن تقع في محظور شرعي بالسف على شيء ديني.
4- بلاش نهدم كل حد بيكلمنا في الدين وننتظر لكل واحد فيهم أول غلطة عشان نتهمه في دينه لإنه لو كل حد غلط هدمناه مش هنلاقي حد لإن العصمة انتهت مع موت النبي صلى الله عليه وسلم وكلنا خطاء.
5- ألم الضربة بيبقى أعظم لما ييجي من أخوك فبلاش أهل الدين ومحبي الدين يبقوا أول واحد يطعن أخيه ويظن فيه السوء .. سيبنا إيه لكارهي الدين.
6- لو حد في يوم سمعت منه طيب ثم اتهموه في دينه افتكر له الخير اللي له عندك وادع له بالهداية قبل ما تشاركهم وادي له فرصة يتراجع ويعتذر مش لازم دايما تحسسه إنه تحت السكينة.
7- وأخيرا جايز أكون فعلا غلط ما أنا بشر خطاء ولو كده فأسأل الله أن يغفر لي خطأي وأن يصلحني ويحسن نيتي وأنا مسامح والله كل من طلب مني السماح ولو بينه وبين نفسه من غير ما يوصلي .. مسامحك يا سيدي
أنا بحبكم في الله ❤.
